പുകവലി ആരോഗ്യത്തിന് ഹാനികരമാണ് |
Jul 6, 2007 |
ആദ്യത്തെ പുകയിൽ കവർന്നെടുക്കപ്പെടുന്ന ഒരു കടലുണ്ട് ഓരോ തിരയിലും മുങ്ങി നിവരുന്ന ജീവിതമുണ്ട് ഓരോ ജീവിതത്തിലും കണ്ടെടുക്കപ്പെടാനാവാത്ത പുകയുടെ ഒരാകാശമുണ്ട്....
സങ്കോചത്താലൊളിപ്പിക്കപ്പെടുന്നത് ചിരിയിൽ മറയ്ക്കപ്പെടുന്നത് കരച്ചിലാൽ മറയിടപ്പെടുന്നത്!
ആദ്യത്തെ പുക, കടലു കാണുവാൻ പോയ- കുട്ടിയുടെ ആദ്യത്തെ തിരക്കാഴ്ചയാണ്: തിരകൾക്കുള്ളിലെ ജീവികൾ..ജീവിതങ്ങൾ...
ജലത്തിലിഴയുന്നത് മുങ്ങി നിവരുന്നത് മുങ്ങി മറയുന്നത് ചിപ്പിയിലൊളിച്ചിരിക്കുന്നത് കല്ലിലൊട്ടിയിരിക്കുന്നത് പറന്നാകാശം തേടുന്നത്.... *********************** പുക, മഴയ്ക്കും മുമ്പേയെത്തുന്നു പിടഞ്ഞ കാറ്റായി... ഉടഞ്ഞ ചിറകായി...
കാറ്റു പെയ്യുന്ന ചില കളികളുണ്ട്: -ഒന്നാനാം കുന്നിന്മേൽ ഓരടി മണ്ണിന്മേൽ... ഒന്നാം ക്ലാസ്സിലെ കുട്ടി കാറ്റു കൊള്ളുന്നു.
കടൽ തീരങ്ങളിൽ കാറ്റാടി നടുന്നു കാറ്റാടി കൂവുന്നു: -കൂ...കൂ.... കാറ്റിന്റെ കൂക്കിൽ കാടുറയുന്നു കുട്ടി,കാടു കാണുന്നു കാടിന്റെ നിറം, മഴ. ******************* മഴയായിത്തീരുന്ന പുകയുണ്ട്, ഓർമ്മകൾ പോലെ.
ഒരിക്കലും പെയ്തുതീരാതെ പുകമറയിലേക്ക് തീ ചോദിച്ചെത്തുന്ന ചിലരുണ്ട്: ഇഛയുടെ വിരൽ നീട്ടി, ദേശാടന പക്ഷിയെപ്പോലെ... ********************* അവസാനത്തെ പുക, കാമുകിയുടെ ആദ്യചുംബനമെന്നാരോ...
അവസാനത്തെ പുകയിൽ, അറുത്തെടുക്കപ്പെടുന്ന കടലുണ്ട്. ഓരോ തിരയിലും ശ്വാസം തേടുന്ന ജീവിതമുണ്ട്. കണ്ടെടുക്കപ്പെടാനാവാത്ത കടപ്പാടുകൾ...
ഒരു ചിരിയിലും മായാതെ... ശവമായങ്ങിനെ...
|
|
|
|
|
|