എന്തൊരു തോരാമഴയെന്ന്, കാലം തെറ്റിയ കാലമെന്ന്, അനുഭവിച്ചോ അനുഭവിച്ചോന്ന്, മഴയങ്ങനെ...
പെയ്തും,നെയ്തും
മഴയായങ്ങനെ...
മഴമാനം മഴമരങ്ങള് മഴവീടുകള് മഴമുറ്റങ്ങള് മഴത്തോടുകള് മഴക്കുളങ്ങള്
മഴ മാറിയിട്ടു വേണം പുറത്തേക്കിറങ്ങുവാന്; മഴ മടക്കിവെച്ചതു- നിവര്ത്തിയിടുവാന്....
മഴക്കുളിരിലുച്ചി തലോടി, തലയിലുമെച്ചില് എച്ചില് വഴുപ്പിലൊരാലു കിളിര്ത്തു!
മേലാകെ പുല്ലു മുളച്ചു തുമ്പയും,മുക്കുറ്റിയും തൊട്ടാവാടിയും പടര്ന്ന് മേനിത്തൊടി കാടായി
ഇഴജന്തുക്കള് ഇലപ്രാണികള്
കുട്ടികള് വരാതായി, കുറ്റിരുട്ടു കൂടു വെച്ചു.
എല്ലിന് കൂട്, വഴുക്കുപാറകളായി.
തെന്നിവീണ- കൂട്ടുകാര്വഴി മറന്നവരായി...
കണ്ണും,കാതും പൊട്ടി തിമിര്ത്തൊഴുകിയ മഴയില് ഒരുക്കി വെച്ചതൊക്കെ ഒലിച്ചു പോയി,
തോടും,കായലും കടന്ന് കടലോളമെത്തി- കരകവിഞ്ഞ തിരകളില് മാഞ്ഞു...
ഇനി, മഴയൊഴിയുമ്പോള് പുറത്തേക്കിറങ്ങണം, ഓര്മ്മയുടെ ഭൂഖണ്ഡമായി... |
"ഇനി,
മഴയൊഴിയുമ്പോള്
പുറത്തേക്കിറങ്ങണം,
ഓര്മ്മയുടെ ഭൂഖണ്ഡമായി..."