 പ്രണയിക്കുന്നുവെന്നു പറയുമ്പോഴും എങ്ങിനെയൊക്കെയാണ്‌ നീ എന്നെ പ്രണയിക്കുന്നതെന്ന്‌ അറിയുവാനാണ്
ആണിന്‌റെ ശരീരം
ഒട്ടും ഭംഗിയില്ലാത്തതെന്ന്‌
മടിയില്‍ കിടന്നു നീ
കൊഞ്ചിപ്പറയുന്നു
എന്‌റെ കട്ടിമീശ
നിനക്കു പ്രിയപ്പെട്ടതെന്ന്
കാതു കടിച്ചു
മന്ത്രിക്കുന്നു
ഏതു പെണ്‍ശരീരത്തിനുമൊപ്പം ഞാന്‍ ത്രസിച്ചോടുന്നുവെന്ന്‌
കഴുത്തില്‍ നീ വാരിപ്പുണരുന്നു
കിടപ്പറയിൽ
മഞ്ഞുരുക്കത്തെക്കുറിച്ചല്ലാതെ
മറ്റൊന്നും പറയുവാനില്ലേ എന്ന്
പുതപ്പിനുള്ളില്‍ വിയര്‍ക്കുന്നു
മസിലുരുണ്ടു കൂടിയ
കൈയും നെഞ്ചും
ഛര്‍ദ്ദിലാവുന്നുവെന്ന്‌
എന്‌റെ വിരല്‍ തുമ്പിൽ ചെറുനാരങ്ങ നുണയുന്നു
എങ്ങിനെയാണ്‌
നീയെന്നെ പ്രണയിക്കുന്നത്‌
മുല ചുരത്തിയോ
തൊട്ടിലാട്ടിയോ
മടിയിലുറക്കിയോ
പൊട്ടിതെറിച്ചോ
ഞാന്‍ കണ്ണുമിഴിക്കുമ്പോള്‍
നീ
എന്നെതന്നെ നോക്കി ചിരിച്ചോ കരഞ്ഞോ അപരിചിതമായ കുഞ്ഞുമുഖത്തോടെ |
ഞാന്‍ കണ്ണുമിഴിക്കുമ്പോള്‍
നീ, എന്നെതന്നെ
നോക്കിയിരിക്കുകയായിരുന്നുവല്ലൊ;
അപരിചിതമായ മുഖത്തോടെ!