ആമ സംസാരിക്കുന്നു
ആദ്യം കേട്ടത് കരയില് ഒളിഞ്ഞിരുന്നാണ്. മുട്ടയിട്ട്, കടലിലേക്കു തുഴഞ്ഞിറങ്ങുവാന് നേരം
കള്ളന് കാണാതെ കാറ്റും,കോളുമേല്ക്കാതെ കാത്തു കൊള്ളണേയെന്ന്!
തലയില്ലാതെ കൈകാലുകളില്ലാതെ ഒരു പുറന്തോട് കരയിലമര്ന്നു കരയുന്നത്; കടലിലേക്കു കരഞ്ഞിഴയുന്നത്.
പിന്നെ, കടലില് വെച്ചു- കണ്ടുമുട്ടുമ്പോഴെല്ലാം ആമ എന്നോടു സംസാരിച്ചു.
ജനിച്ചിറങ്ങിയ കരയെക്കുറിച്ച് മണലിന്റെ വീട് പാറകളുടെ മതില്ക്കെട്ട് ഇലകളുടെ കാട് പാറ നനഞ്ഞിറങ്ങുന്ന പുഴയൊഴുക്ക്....
ജലത്തിനുള്ളില്, തല നീട്ടി കൈകാലുകള് നിവര്ത്തി ആമ പറഞ്ഞുകൊണ്ടിരുന്നു!
വിരിഞ്ഞിറങ്ങിയ കുഞ്ഞുങ്ങള് ഏതു കടലില്.... അവരുടെ മുട്ടകള് ഏതു കരയില്.... ? അവരുടെയൊക്കെ വീട് മതില്ക്കെട്ട് കാട് പുഴ....
കാല്പനികമാണ്, ആമയുടെ വര്ത്തമാനവും! |
കാല്പനികമാണ്,
ആമയുടെ വര്ത്തമാനവും!