തൊട്ടു വിളിക്കുമോ നിങ്ങളെന്നെ . അപ്പുറത്തിപ്പുറത്തോരോ വീടു കെട്ടി, കെട്ട വിളക്കൂതിയുറങ്ങും കൂട്ടുകാരേ... . ഉണരുവാന്‍ നേരമായെന്നു അലാറം, അലറിപ്പാഞ്ഞു വരും. രാത്രിയിലിരുട്ടില്‍ പണി കഴിപ്പിച്ച വീടുകള്‍ വെളിച്ചത്തില്‍ തകര്‍ന്നു പൊള്ളും മണലായി മാറും. . മുറ്റത്തെ പേര മരത്തിന്‍ മണം മായും തെക്കേയതിരിലെ പുളിമരത്തണലാരോ മടക്കിക്കെട്ടി മടങ്ങും. . മുറ്റമടിച്ചു നനയ്ക്കുവാനെത്തുന്ന കാളിത്തള്ളയെ വരും വഴിക്കൊരു പരുന്ത് കൊത്തിയെടുത്ത് പറന്നു പോവും! . കൂവിയുണര്‍ത്തും മുമ്പെ കോഴികള്‍ വെന്തു തിളച്ചു മണം പരത്തും . ആദ്യത്തെ ബെല്ലിനോടൊപ്പം ക്ലാസിലേക്കോടുന്ന വഴി മതിലു കെട്ടി മുറിഞ്ഞു പോകും! . അമ്മ വിളിക്കുമെന്നോര്‍ത്തു ഉറക്കം ഉറക്കത്തെ കെട്ടിപ്പിടിച്ചുറങ്ങുമ്പോള്‍ തൊട്ടു വിളിക്കുമോ നിങ്ങളെന്നെ, കെട്ട വിളക്കൂതിയുറങ്ങും കൂട്ടുകാരേ... . ഉറങ്ങാതെ കാവലിരുന്നു മിടിക്കും അലാറം വിളിച്ചുണര്‍ത്തുമ്പോള്‍ തൊണ്ടയില്‍ തടഞ്ഞു തേങ്ങുന്നൂ, അത്താഴം . ഇരുട്ടില്‍ ആരും കാണാതെ അടയാതെ കണ്ണുകള്‍ . പടിയിറങ്ങുമ്പോള്‍ വിറച്ചു വാരിപ്പിടിച്ച വാതില്‍... . ഉണരുവാന്‍ നേരമായെന്നു അലാറം അലറിപ്പാഞ്ഞു വരും . നേരമില്ല, കൂനിപ്പിടിച്ചിരിക്കുവാന്‍, പനിയെന്നു പാതി നുണയോതി മടി പിടിക്കുവാന്‍, മലക്കം മറിഞ്ഞു കുളിക്കുവാന്‍... . അപ്പുറത്തിപ്പുറത്ത് കൂട്ടുകാരില്ല വിളിപ്പുറത്തില്ല, വീടുകളൊന്നും! |
അലാറത്തിനായി
കാതോര്‍ത്തു കിടക്കുമ്പോള്‍,
എല്‍.കെ.ജി ക്കാരന്‍ മകന്
കാലത്തുണരുവാന്‍
ഒരലാറം വാങ്ങിക്കൊടുക്കുമ്പോള്‍...