ഒപ്പിടുമ്പോള്‍ ഓരോ തവണയും
സംശയിച്ചിരുന്നു...
എസ്‌.എസ്‌.എല്‍. സി ബുക്കില്‍
കൈകള്‍ ചലിച്ചത്‌
ഇങ്ങിനെ വിറച്ചു വിറച്ചോ,
പാസ്പോര്‍ട്ടിനുള്ള അപേക്ഷയില്‍
അടയാളപ്പെട്ടത്‌
ഈ കുറിയ വരകളാല്‍ ചുരുണ്ടുകൂടിയോ,
തറവാട്‌ ഭാഗം വെച്ചപ്പോള്‍
ഒപ്പിട്ടു മുറിച്ചത്‌
ഇങ്ങനെ സ്വയമടര്‍ന്നു വീണോ,
പഞ്ഞമായിരുന്നിട്ടും
എഴുതിക്കൊടുത്ത ചെക്കുകളില്‍
പിടഞ്ഞു നിന്നത്‌ ഈ രൂപക്കൂട്ടിലോ...
ഒപ്പിടുമ്പോള്‍ ഇപ്പോഴും
എനിക്കെന്‌റെ മുഖത്തു നോക്കാനാവില്ല;
ആരോ അവിടെ ഒളിഞ്ഞിരിക്കുന്നുണ്ട്‌
പതിഞ്ഞു ശ്വസിക്കുന്നുണ്ട്‌! |
ഒപ്പിടുമ്പോള്‍
ഒപ്പിയെടുക്കാനാവുന്നു,
ചിലതെല്ലാം...