കടലേ,മഴയെന്ന്‌ വിളിക്കില്ല നിന്നെ
Jun 3, 2008
മഴ
മഴ...
എന്നാര്‍ത്തു തുള്ളില്ല
കടലേ,നീയെത്ര കരഞ്ഞാലും
തിര പൊക്കി
ഏതാകാശം മുട്ടിയാലും
കര കവര്‍ന്ന്‌
മരവും,മലകളും മായ്ചാലും.

കടലേ,
വെന്തു തിളയ്ക്കുന്നു നീ
ഓരോ തുള്ളിയും
പേരില്ലാ മഴയായ്‌
മേഘങ്ങളില്‍
കരിമ്പടം പുതച്ചൊളിപ്പിക്കുന്നു നീ
ഇടിമിന്നലായ്‌
ഇടവത്തെയ്യമാടുന്നു നീ

മഴ
മഴ...
തുള്ളിത്തുള്ളിയും
ചാഞ്ഞുചാറിയും
കോരിയൊഴിച്ചും
ആര്‍ത്തു വിളിക്കില്ല നിന്നെ

കടലേ നീ,
മണ്ണ്‌ മണപ്പിച്ചു തഴയ്ക്കില്ല
കുളത്തില്‍ ചാടി മുങ്ങില്ല
തോടായ തോടൊക്കെ ഓടി നടക്കില്ല
വീടുവീടാന്തരം കയറിയിറങ്ങില്ല...

മരം നനയ്ക്കില്ല
മലയിറങ്ങില്ല
ഇലത്തുമ്പില്‍ മുളച്ചടരില്ല
ഇറയത്തീറന്‍ തൂക്കില്ല
ഒരു കുട്ടിയും കടലാസ്‌ തോണിയിറക്കില്ല...

മഴ
മഴ...
എന്നാര്‍ത്തു പെയ്യും മഴയിലും
അലറിക്കരഞ്ഞോ നീ;
ഉപ്പ്‌ കയ്ക്കുന്ന തിരമറിച്ചിലില്‍
എന്‌റെ മക്കളേയെന്നു നെഞ്ചത്തടിച്ചോ നീ...


 

 
5വായന:
  • Blogger നസീര്‍ കടിക്കാട്‌

    മലയാളമിപ്പോള്‍
    മഴയാണെനിക്ക്‌

     
  • Blogger Ranjith chemmad

    നന്നായിരിക്കുന്നു
    ഈ താരതമ്യപഠനം

     
  • Blogger നൊമാദ്.

    മഴയെക്കുറിച്ച് എത്ര എഴുതിയാലും എങ്ങനെ മതിയാവാന്‍. ഇഷ്ടമായി

     
  • Blogger തണല്‍

    മഴയാണെനിക്കും
    മലയാളം..കൊള്ളാം മാഷേ:)

     
  • Blogger ചന്ദ്രകാന്തം

    '......ഇലത്തുമ്പില്‍ മുളച്ചടരില്ല
    ഇറയത്തീറന്‍ തൂക്കില്ല....'
    കാറ്റിന്റെ ഈണത്തിനൊപ്പം
    ലാസ്യനൃത്തമാടില്ല..
    ഓരോ മണ്‍തരിയിലും
    ഉണര്‍‌വ്വിന്‍ സംഗീതമാകില്ല.

    മഴയോളം വരില്ല... പെയ്തടിഞ്ഞ കടല്‍..

     
Post a Comment
സംക്രമണം >>
 



2011
2010
2009
2008
2012
2007