ഉണർന്നെണീറ്റാൽ കോഴിക്കൂട് തുറന്നിടും അമ്മ. പൂവൻ കാത്ത് നിൽക്കുകയാവും സൂര്യനെ നോക്കിയൊന്ന് കൂവാൻ
പുറ്റ് പിളർന്ന് മണ്ണിര തലനീട്ടി നോക്കുകയാവും കോഴിക്കൊത്തിന്
അടിച്ചുവാരി തെറിച്ച അരിമണിയും പരിപ്പും പയറും കാതോർക്കുകയാവും ചിക്കിപെറുക്കിയുള്ള കോഴിയുടെ കാലൊച്ചക്ക്
പൈപ്പിൻ ചോട്ടിൽ ഒലിച്ചു നീളുന്ന നനവ് ദാഹിച്ച് പിടയുന്നുണ്ടാവും കോഴിയുടെ തൊണ്ടക്ക്
മൈലാഞ്ചി ചോട്ടിൽ കൂമ്പി നിൽക്കുകയാവും പിട ചിറക് വിരിച്ചെത്തുന്ന ആവേശത്തിന്
അടുപ്പ് കല്ലിൽ വെന്ത് ചുവന്ന ഉള്ളി പിറുപിറുക്കുന്നുണ്ടാവും വന്നില്ലല്ലൊ കോഴി…
പടിഞ്ഞാറെത്തുമ്പോൾ സൂര്യൻ വിളിച്ചു ചോദിക്കുന്നുണ്ടാവും കോഴിക്കൂടടച്ചോന്ന്
ഇരുട്ടിൽ കുറുക്കൻ കാത്ത് നിൽക്കുകയാവും വാതിൽ തുറന്നിറങ്ങാൻ നിലാവ് നോക്കി ഓരിയിടാൻ |
കൊ കൊ കൊ കൊ.....