പണ്ടൊന്നും ഇങ്ങിനെയായിരുന്നില്ലെന്ന് അമ്മ അടച്ചുപൂട്ടിയിടും വാതിലും ജനലും ഇടക്കിടെ സംശയിച്ച് തള്ളിനോക്കും ഒരോ മുറിയിലും കയറിയിറങ്ങും എല്ലാവരുമില്ലേ അടുപ്പത്ത് കാത്ത്നിൽക്കും വെന്തുതീരും വരെ കിണറ്റിന്നാഴത്തിലേക്കിറങ്ങി ഉറവ വറ്റിയിട്ടില്ലെന്ന് നനഞ്ഞ്കയറും തെങ്ങും മാവും പ്ലാവും കവുങ്ങും എണ്ണിയെണ്ണി നടക്കും തങ്കേച്ചിയുടെ മുറ്റത്തെ പ്ലാവ് സാറാമ്മച്ചേട്ടത്തിയുടെ പറമ്പിൽ അടിമുടി കായ്ച് നിൽക്കുന്നത് കണ്ടവരുണ്ട് ആമിനാത്ത അരി അടുപ്പത്തിട്ട് മഗ്‌രിബ് നിസ്കരിക്കാൻ നിന്നതാണ് ജാനകിയുടെ അടുക്കളയിലുണ്ട് ചോറ് തിളച്ചുപൊന്തുന്നു എട്ടാംവാർഡിലെ ഗൾഫുകാരന്റെ വീട് തൊട്ടടുത്ത മുനിസിപ്പാലിറ്റിയിൽ അതേപടി തലയുയർത്തിനിൽക്കുന്നുവെന്ന് പത്രത്തിൽ വാർത്ത വന്നു ഇരുട്ടത്ത് അമ്മയുടെ വിരലെന്നെ തിരഞ്ഞ്‌വരും കൈകാലുകൾ കണ്ണ് മൂക്ക് ചെവി… എല്ലാം അവിടെതന്നെയില്ലേ? ഇരുട്ടിൽ വിറച്ചുനിന്ന വിരലിനോട് ചോദിച്ചു ആരാ, മനസ്സിലായില്ലല്ലൊ |
