| വസന്ത |
| Aug 9, 2009 |
എഴുപതുകള്‍ക്കൊടുവില്‍
ചാവക്കാട്ടെ ഹൈസ്ക്കൂളില്‍
പഠിക്കുന്ന കാലത്ത്
ജയന്റെ സിനിമകള്‍
റിലീസ് ചെയ്തുതുടങ്ങിയിരുന്നു
സോമനേയും വിന്‍സന്റിനേയും
പോലെയല്ല
എന്തൊരു മസിലായിരുന്നു
തിയേറ്ററിലിരിക്കുന്നവര്‍ക്കും
മസില് പെരുക്കും
മോഹന്‍‌ലാലും മമ്മൂട്ടിയുമൊക്കെ
പഠിക്കാന്‍ പോകുന്ന കാലമാവണം
അക്കാലത്താണ്
കോഴിവസന്ത പടര്‍ന്നത്
തൊട്ടവീട്ടിലെ ഭാസ്കരേട്ടന്‍
അടിയന്തിരാവസ്ഥയെ തെറിവിളിച്ച്
കുടിച്ചുകൂത്താടി
കാലൊടിഞ്ഞ് കിടപ്പായപ്പോള്‍
നല്ലതങ്ക കോഴിവളര്‍ത്തിയാണ്
മക്കളെ പോറ്റിയത്
വസന്ത വന്ന് കോഴികള്‍ ചത്തപ്പോള്‍
പട്ടിണിയായി
ചന്ദ്രന്റെ പിന്നാലെ നടന്ന്
ഭാസ്കരേട്ടന്‍ നക്സലൈറ്റായി
ഒമ്പതാംക്ലാസ്സിലെ വസന്തയെ കാണുമ്പോള്‍
എല്ലാവര്‍ക്കും ചിരിയായി
മാറിക്കോ കോഴിവസന്തയാണെന്ന്
ആണ്‍‌കുട്ടികള്‍ക്ക് കളിയായി
പഠിപ്പ് നിര്‍ത്തി വസന്ത
പാടത്തെ പണിക്ക് പോയി
കുടിച്ചുകുടിച്ച് കരള് കത്തി
ഭാസ്കരേട്ടന്‍ ചത്തപ്പോള്‍
നക്സല്‍ ചന്ദ്രനെ കാണാതായി
ജയന്റെ സിനിമകള്‍ക്ക് ടിക്കറ്റ് കിട്ടാതെ
നിരാശപ്പെട്ട കാലത്ത്
പത്തില്‍ തോറ്റ്
തമിഴ്നാട്ടിലെ വില്ലുപുരത്ത്
പപ്പടപ്പണിക്ക് പോയപ്പോഴാണ്
മഞ്ഞളരച്ചുതേച്ച തമിഴത്തികളെ കണ്ട്
വസന്തയെ വീണ്ടും ഓര്‍മ്മ വന്നത്
അവളെ പ്രേമിച്ചിരുന്നല്ലോയെന്ന്
ഉള്ള് പിടഞ്ഞത്
അക്കാലത്താണ് ജയന്‍
ഹെലിക്കോപ്ടറില്‍ നിന്ന് വീണുമരിച്ചത്
മടങ്ങിവന്ന് കോഴിവളര്‍ത്തലായി
പെണ്ണ് കെട്ടി
മോള്‍ക്ക് വസന്തയെന്ന് പേരിട്ടു
മോന് ജയനെന്നുംLabels: കവിത |
| |
|
|
|
|
|
വസന്ത