കുട്ടികളേ നിങ്ങളുടെ മാഷ് ഞാനായിരുന്നെങ്കില് അക്ഷരങ്ങള്ക്ക് ചിറകും കൊക്കും തന്ന് പറക്കാന് പഠിപ്പിക്കാമായിരുന്നു മലകള്ക്കും പലപല നാടുകള്ക്കും മുകളില് സ്വന്തം പേരും ക്ലാസ്സും ഡിവിഷനുമെഴുതാമായിരുന്നു നിങ്ങളുടെ നോട്ട്ബുക്കില് വെട്ടിയും തിരുത്തിയും എനിക്ക് ഒപ്പിടാമായിരുന്നു
അളവെടുക്കാനെത്തിയവരേ നിങ്ങളുടെ തയ്യല്ക്കാരന് ഞാനായിരുന്നെങ്കില് നെഞ്ചോട് ചേര്ത്ത് ചുവന്ന റോസാപ്പൂ തുന്നി മിടിപ്പുകളെ മണമുള്ളതാക്കാമായിരുന്നു ആര്ക്കും അടര്ത്തിയെടുത്ത് തലയില് ചൂടാന് പലനിറത്തില് പൂക്കള് വിരിയുന്ന ചെടികള് തുന്നാമായിരുന്നു നിങ്ങളുടെ കീശയില് ആരും കാണാതെ കൈയിട്ട് നോക്കാമായിരുന്നു
ഫോട്ടോയെടുക്കാന് മുഖം വെളുപ്പിച്ചെത്തിയവരേ നിങ്ങളുടെ ഛായാഗ്രാഹകന് ഞാനായിരുന്നെങ്കില് കണ്ണുകളില് നീലക്കടലൊഴുക്കി പ്രണയത്തിന്റെ കപ്പലുകള് ആഴങ്ങളിലേക്ക് മറയുന്നത് ഒറ്റ ക്ലിക്കില് ഒപ്പിയെടുക്കാമായിരുന്നു കവിളുകളില് ചുംബനച്ചൂട് പൊള്ളിയതിന് പാട് അതേപടി പകര്ത്താമായിരുന്നു നിങ്ങളറിയാതെ എന്തോ ഓര്ത്തുനില്ക്കുന്ന കാഴ്ച എന്റെ ഫോട്ടോ ശേഖരത്തില് ഒളിപ്പിക്കാമായിരുന്നു
മറ്റൊരാളായിരുന്നെങ്കില് മറ്റെന്തൊക്കെയാകാമായിരുന്നു....