ദൈവമൊരുനാള് വിരല് കടം ചോദിച്ചു. പാവം, വരച്ചും മായ്ചും പത്തു വിരലും മടുത്തിട്ടാവും.
പെരുവിരല് തരില്ല, ഈമ്പിയീമ്പി കുടിക്കുവാന് അമ്മിഞ്ഞയെന്നമ്മ സത്യം ചെയ്യിച്ചതാണ് മാറ് ചുരത്തിയതാണ് ചൂടാറിയിട്ടില്ല.
ചൂണ്ടുവിരല് തരില്ലൊട്ടും പലവഴി ചൂണ്ടി ദിക്കുകള് കൊത്തും കൊക്ക് കിളി മകള് ദേശാടനത്തിന് നെറുകയിലെ ഉമ്മയുമ്മ... തരില്ല.
നടുവിരലില് ചാരുകസേര അച്ഛനുറക്കമാണ് ഒച്ച വേണ്ട കഥ കേള്ക്കണമെന്നു- തൊട്ടുണര്ത്തേണ്ട ഒറ്റച്ചവിട്ടെന്നു പഴി കേള്ക്കേണ്ട. തൊട്ടുപോകരുത്, നടുവിരല്.
മോതിരവിരലില് അവളുടെ പേരു കൊത്തിയ സ്വര്ണ്ണം തിളയ്ക്കുന്നു. വിളിച്ചാല് വിളിപ്പുറത്ത് കരച്ചിലിന് പാതി. മറ്റാരും, ദൈവമായാലും തൊടൊല്ലെ തൊട്ടു വാടിക്കൊല്ലെ.
ചെറുവിരലില് തൂങ്ങി പേരക്കുഞ്ഞ് പിച്ചാ പിച്ചാ... നൂറായിരം ചോദ്യം ദൈവമേ, നിനക്കും ഉത്തരം മുട്ടും. വേണ്ട, പേരക്കുഞ്ഞിനെ തൊടേണ്ട പോ പൂതമേ
കൊതിക്കെറുവില് ദൈവമൊരുനാള് കൈ രണ്ടും കട്ടെടുത്തു. Labels: കവിത |
കൊതിക്കെറുവില്
ദൈവമൊരുനാള്
കൈ രണ്ടും
കട്ടെടുത്തു.